پروفیسر محسن عثمانی ندوی آٹھویں آئی او ایس لائف ٹائم اچیو مینٹ ایوارڈ سے سرفراز

پی ڈی ایف / پرنٹ

معروف دانشور ،محقق اور مصنف پروفیسر محسن عثمانی ندوی کو ان کی گراں قدر خدمات کی بنیاد پر انسٹی ٹیوٹ آف آبجکٹیواسٹڈیز کا آٹھواں لائف ٹائم اچیومینٹ ایوارڈ نئی دہلی میں 22؍فروری کو ایک تقریب کے دوران پیش کیاگیا ۔تفویض ایوارڈ کا یہ پروگرام جامعہ ملیہ اسلامیہ کی سی آئی ٹی بلڈنگ کے ایف ٹی کے ہال میں منعقد ہوا۔
پروفیسر عثمانی ندوی درجنوں کتابوں کے مصنف ہیں ۔ جے این یو میں اسسٹنٹ پروفیسر رہ چکے ہیں ، دارالعلوم ندوۃ العلماء اور انسٹی ٹیوٹ آف آبجیکٹیو اسٹڈیز کی گورننگ کونسل کے ممبر ہیں ۔ تعلیمی ، تصنیفی اور فکری میدان میں ان کی گراں قدر خدمات ہیں، جس کی بنیاد پر آئی او ایس کی ایوارڈ کمیٹی نے آٹھویں آئی او ایس لائف ٹائم اچیو مینٹ ایوارڈ کیلئے پروفیسر محسن عثمانی ندوی کا انتخاب کیا۔
پروفیسرعثمانی کو لائف ٹائم اچیومینٹ ایوارڈ میں سپاس نامہ ، ایک لاکھ روپے کا چیک اور ایک ٹرافی پیش کیا گیا ۔آل انڈیا مسلم پرسنل لاء بورڈ کے نائب صدر مولانا جلال الدین عمری نے سپاس نامہ پیش کیا ۔ آئی او ایس کے سکریٹری جنرل پروفیسر زیڈ ایم خان نے چیک ‘جب کہ انسٹی ٹیوٹ کے چیرمین ڈاکٹر محمد منظور عالم نے مومینٹوپیش کیا ۔ اس موقع پر پروفیسر محسن عثمانی کی شخصیت اور خدمات پر ایک ڈاکیو مینٹری فلم بھی ریلیز کی گئی ۔
مولانا جلال الدین عمری نے ایوارڈ کے سلسلہ کی ستائش کرتے ہوئے اسے آئی او ایس کا تاریخی اور نمایاں کارنامہ بتایا۔ ڈاکٹر محمد منظور عالم نے اپنے صدارتی خطاب میں کہاکہ ایوارڈ کا مقصد خدمات کی ستائش قدر اور حوصلہ افزائی ہے اور یہ پیغام ہے کہ نئی نسل میں جذبہ اور امنگ پیدا کرنے کا تاکہ وہ اپنے اندر نمایاں کارنامہ انجام دینے کا جذبہ اور شوق پیدا کریں ۔
واضح رہے کہ اس سے قبل یہ ایوارڈ درج ذیل شخصیات کو مل چکاہے ۔جسٹس اے ایم احمدی، امارت شرعیہ پھلواری شریف، پٹنہ ۔ ڈاکٹر اخلاق الرحمن قدوائی ۔ پروفیسر بی ۔شیخ علی۔ مولانا ڈاکٹر سعید الرحمن اعظمی ندوی ۔ جناب اے جے نورانی اورپروفیسر اختر الواسع ۔
2007میں ہندوستان کے مشہور تھنک ٹینک ادارہ انسٹی ٹیوٹ آف آبجیکٹیو اسٹڈیز نے لائف ٹائم اچیو مینٹ ایوارڈ دینے کا سلسلہ شروع کیا تھا۔اس ایوارڈ کا بنیادی مقصد‘ قانون ، صحافت ، سائنس ، ٹیکنالوجی ،ادب اور دیگر علوم میں نمایاں خدمات انجام دینے والوں کی حوصلہ افزائی اور ان کی خدمات کی قدر کرنا ہے تاکہ نئی نسل کو حوصلہ ملے اور زیادہ سے زیادہ لوگوں میں مہارت حاصل کرنے اور اپنے فن میں ممتاز بننے کا شوق اور جذبہ پیدا ہوسکے ۔